ഞങ്ങളുടെ പ്രിയപ്പെട്ട അജപാലകന്റെ ജീവിതവഴികളെ ഒരു കവിതയിലൂടെ സങ്കല്പിക്കുകയാണിവിടെ.
ഇടവകാംഗമായ സോമി പുതനപ്ര (എഡിറ്റർ, L’ALPHA ) കുറിക്കുന്നത്.

അമ്മയ്ക്കിമ്പമണച്ചൊരു തുമ്പ-
പ്പൂ പോൽ അന്നു വിരിഞ്ഞപ്പോൾ,
ദൈവം തന്നൊരു നിധിയാണെന്നവ-
ളന്നു പറഞ്ഞു നടന്നെങ്ങും!

അച്ചന്മാരുടെ ഓമനയായ്,
അധ്യാപകരുടെ കണ്മണിയായ്,
നാട്ടാർക്കെല്ലാം കൂട്ടാളായ്,
നാട്ടിൽ വളർന്നൊരു നൽകാലം!

കാടും പുഴയും കായൽപുറവും
പാട്ടുകൾ പാടും കുരുവികളും
കണ്ണും കാതും ഹൃദയവുമൊരുപോൽ
കവരുന്നോരോ കാഴ്ചകളും

ഉദയം മുതൽ അസ്തമയം വരെയും
ഉടയോനെ നിൻ പുകൾ പാടാൻ
ക്യാമറയൊന്നെൻ കൈയിൽ തൂക്കി
കാതങ്ങൾ ഞാൻ താണ്ടുന്നു.

അന്നൊരു നാളിൽ സാമുവലെ പോൽ
ദൈവത്തിൻ മൃദു സ്വനമുരുവായ്,
‘സായൻ’ നിന്നെ എനിക്കെന്തിഷ്ടം
പോരുന്നോ എൻ വേലയ്ക്കായ്!

നിൻ വിളി കേട്ടും നിന്നെ നിനച്ചും
നിൻ കല്പനകൾ പാലിച്ചും
നിൻ ജന സേവനമെന്നും ചെയ്യാൻ
നിൻ തുണ ചിന്തുക, ദാസനിൽ നീ!

പഠനം ഗഹനം, ധ്യാനം തീവ്രം
പല പല ജീവിത പാഠങ്ങൾ
പ്രലോഭനങ്ങൾ, പ്രതിസന്ധികളും
പ്രിയനേശുവിനെ പിൻ ചെൽകെ!

താതനുമതുപോൽ ആത്മജനും
പ്രിയ റൂഹായും ചേർന്നെന്നാളും,
താങ്ങി നടത്തിയതോർത്തെന്നും
തിങ്ങും ഹൃദയം നന്ദിയൊടെ!

വിളക്കായ് മുൻപിൽ വച്ചതല്ലൊ
‘പുരോ’ഹിതാ, നിന്നെ ദൈവമിഹ!
പ്രശോഭിക്ക കാട്ടിൻ നടുവിലും നീ
വഴിതെളിച്ചെന്നും നയിക്ക മോദാൽ ..

A Tale of Talents.