മരം ചോദിച്ചു: "കിളികൾക്കു കൂടാര്? മണ്ണിനു കൂട്ടാര്? പുഴയ്ക്കു അഴകാര്? പഥികനു തണലാര്?" അയാൾ ഇങ്ങനെ പ്രതിവചിച്ചു: "മരം .. മരം .. മരം .." ആ ഉത്തരം ശരിയെന്നവണ്ണം കിളികൾ കലപിലെ ചിലച്ചുകൊണ്ട് പാറിപ്പറന്നു, ദലമർമ്മരമുണർത്തി കുളുർകാറ്റു മെല്ലെ വിശറിവീശി നിന്നു, പുഴ നാണത്താൽ കുണുങ്ങിച്ചിരിച്ചൊഴുകി. ഉടൻ, ഒരു മഴു സീൽക്കാരമോടെ, മരത്തിന്റെ കടയ്ക്കൽ ആഞ്ഞു പതിച്ചു.. വീണ്ടും .. വീണ്ടും .. വീണ്ടും .. ഒരാർത്തനാദം പോലെ മരം നിലംപൊത്തി.. പിന്നീടൊരിക്കലും കിളികൾ ചിലച്ചില്ല, കാറ്റു വീശിയില്ല.. പുഴ ഒരു നൂലുപോലെ മെലിഞ്ഞു പോയി.. തണലെല്ലാം വെയിൽ തിന്നു തീർക്കുകയും മണ്ണ് വിണ്ടുകീറുകയും ചെയ്തു.. (“Be [...]

അമ്മയിൽ നിന്നു സഹനവും, അച്ഛനിൽ നിന്നു ത്യാഗവും, സതീർത്ഥ്യനിൽ നിന്നു കരുതലും, ഗുരുവിൽ നിന്നു കരുണയും, അക്ഷരങ്ങളിൽ നിന്നു വിശുദ്ധിയും, അനുഭവങ്ങളിൽ നിന്നു ക്ഷമയും ഞാൻ പഠിച്ചു.. അപ്പോൾ, ജീവിതമെന്ന പദപ്രശ്നത്തിന്റെ ഉത്തരം തെളിഞ്ഞു വന്നു: "സ്നേഹം!" (സെപ്റ്റംബർ 5 ഇന്ത്യയിൽ അദ്ധ്യാപകദിനമായി ആചരിക്കപ്പെടുന്നു. എല്ലാ ഗുരുസ്ഥാനീയർക്കും സ്നേഹവന്ദനം?)

സ്വാതന്ത്ര്യം സോമി പുതനപ്ര പ്രഭോ, എന്നിൽ നിന്ന് എന്നെ സ്വതന്ത്രനാക്കേണമേ, ഞാനെന്ന ഭാവത്തെ ജ്ഞാനമാം ദാനത്താൽ ദൂരെയകറ്റേണമേ, ജഡം തൃണസമം അഴിഞ്ഞുപോകുമെന്ന് എന്നെ പഠിപ്പിക്കേണമേ, എന്നിലും നിന്നിലും അവളിലും വ്യാപരിക്കുന്നത് ഒരേ ആത്മാവാണെന്ന തിരിച്ചറിവിലേയ്ക്ക് എന്നെ ഉയർത്തേണമേ, കാലത്തിനുമപ്പുറം അനശ്വരതീരങ്ങൾ ഉണ്ടെന്ന ബോധ്യം എന്നിൽ നിറയ്ക്കേണമേ: ആ അഭൗമതീരത്തിന്റെ ഒടുങ്ങാത്ത സൗന്ദര്യത്തിലേയ്ക്ക് നീ എന്നെ കൈപിടിച്ചു കൊണ്ടുപോകേണമേ..